Эмэгтэйчүүдийн хорт хавдрын дунд ионкарцинома өвчний тархалт, тохиолдлыг судалсан нь

Хураангуй

Үндэслэл: Хорионкарцинома өвчин нь ихэвчлэн умайн эмгэг цус алдалтаар илэрдэг ихсийн трофобластын ховор, хоруу чанар ихтэй хавдар юм. Азийн орнууд, тэр дундаа Япон улсад хорионкарцинома өвчний тархалт нь Европ болон АНУ-тай харьцуулахад харьцангуй өндөр төвшинд байгаа талаар цөөнгүй судалгаанд дурьджээ. Цулцан хураа өвчний тархалт Япон улсад 300-500 жирэмслэлт тутамд 1 тохиолддог бол Европ, АНУ-д 1000-2000 жирэмслэлт тутамд 1 тохиолдож байна гэж Antonio Braga нарын судалгаанд дурьджээ.2 Зорилго: Эмэгтэйчүүдийн нөхөн үржихүйн эрхтний хорт хавдар оношоор хэвтэн эмчлүүлэгсдийн дунд хорионкарцинома өвчний тохиолдол, шалтгаан, өвчлөлийн байдлыг судлах. Арга, аргачлал: Судалгааг ретроспектив судалгааны аргаар, нэг агшингийн загварыг ашиглан гүйцэтгэсэн. Үр дүн: Монгол улсад 2011-2020 оны хооронд эмэгтэйчүүдийн нөхөн үржихүйн эрхтний хорт хавдрын 5390 тохиолдол оношлогдсон байна. Эмэгтэйчүүдийн хорт хавдрын өвчлөлд хорионкарцинома 1.1%-ийг (n=60) эзэлж байна. Хорионкарциномийн улмаас нас барсан 14 тохиолдол байгаа нь нийт нас баралтын дотор 0.6 % эзэлж байна. Судалгаанд хамрагдсан эмэгтэйчүүдийн хорионкарцинома үүссэн шалтгааныг судлахад цулцан хурааны дараа 30.4% (n=17) үүссэн нь дийлэнх тохиолдлыг эзэлж байв. Дүгнэлт: Бидний судалгаагаар хорионкарциномаар өвчилсөн эмэгтэйчүүдийн тохиолдлын тоо нэмэгдэх хандлагатай ч нас баралт буурах хандлагатай байна.