Хот хөдөөгийн өсвөр насны хүүхдүүдийн илүүдэл жин таргалалтыг судлах нь

Хураангуй

Үндэслэл: ДЭМБ-ийн 2020 оны тайланд 1.9 тэрбум насанд хүрэгчид илүүдэл жинтэй байгаа бөгөөд эдгээрийн 650 сая хүн таргалалттай байна. Таргалалтын тархалт 1975 оноос хойш 3 дахин нэмэгдсэн байна. 2020 онд 5-19 настай 340 сая хүүхэд илүүдэл жин, таргалалттай байна.1 Судалгаагаар илүүдэл жин, таргалалт нь Монгол улсын хүн амын дунд 1993-2002 онд 17.3-27% байсан бол 2005 онд 31.6% 2009 онд 39.8% болж тус тус нэмэгдсэн үзүүлэлттэй байна.4 Зорилго: Хот, хөдөөгийн ерөнхий боловсролын сургуулийн (ЕБС) ахлах ангийн хүүхдүүдийн дунд илүүдэл жин, таргалалтын тархалтыг тодорхойлж, хүн амзүй нийгэм эдийн засгийн байдалтай нь холбон судлах. Материал аргазүй: Монгол орны нийгэм эдийн засгийн байдал болон газарзүйн онцлогийг тусгах зорилгоор түүвэрлэлтийг хот, аймаг, сум гэсэн 3 түвшинд хийсэн. Монгол улсын хэмжээн дэх улсын мэдлийн дунд сургуулийн жагсаалтыг боловсрол соёл шинжлэх ухааны яамнаас гаргуулан авсан 593 сургуулиас түүвэрлэн авч нийт 15-18 насны 1005 сурагчдыг судалгаанд хамруулсан. Мэдээ материалыг тоон аргаар цуглуулсан бөгөөд асуумж хуудас нь 8 бүлэг 95 асуултаас бүрдсэн. Үр дүн: Судалгаанд нийт 1005 хүүхэд хамрагдсанаас 32.5% нь Улаанбаатар хотоос, 67.5% нь хөдөө орон нутгаас хамрагдсан байна. Судалгаанд 15-18 настай хүүхдүүд хамрагдсан бөгөөд хүйсээр авч үзвэл 38.4% нь эрэгтэй, 61.6% нь эмэгтэй сурагчид хамрагдсан байна. Биеийн жингийн индексээр сурагчдыг үнэлэхэд 5.9%(59) илүүдэл жинтэй, таргалалттай 0.8%(8) илэрсэн байна. Дүгнэлт: Судалгаанд оролцсон сурагчдын дунд 5.9% нь илүүдэл жинтэй, 0.8% нь таргалалттай байна. Сурагчдын охид нь илүүдэл жингийн хувьд хөвгүүдтэй харьцуулахад илүү байна. Хот хөдөөгийн сурагчдын биеийн жингийн ялгаа ажиглагдсангүй.