Лютеолин-гадолиниум нэгдлийн C48/80-өөр өдөөгдсөн HMC-1 шигүү мөхлөгт эсийн үрэвслийн урвалд үзүүлэх нөлөөг судалсан дүн

Хураангуй

Үндэслэл: Чонон хөрвөс өвчний эмгэг жамд шигүү мөхлөгт эсийн идэвхжил болон үрэвслийн медиаторын ялгаралт голлох үүрэгтэй. Лютеолин нь үрэвслийн болон харшлын эсрэг үйлдэлтэй бөгөөд LutGd нь макрофагийн үрэвслийн загварт үрэвслийн эсрэг идэвх үзүүлсэн нь тогтоогдсон. Гэвч лютеолин-гадолиниум нэгдлийн шигүү мөхлөгт эсэд үзүүлэх нөлөө одоогоор тодорхойгүй байна. Зорилго: C48/80өөр өдөөгдсөн HMC-1 шигүү мөхлөгт эсийн загварт Lut-Gd-ийн эсийн аюулгүй байдал болон үрэвслийн медиаторын ялгаралтад үзүүлэх нөлөөг үнэлэх. Арга, аргачлал: Бид HMC-1 эсийг 48/80 нэгдэл (Compound 48/80, C48/80)-ээр өдөөн загвар үүсгэж, CCK-8 болон LDH аргаар эсийн амьдрах чадвар, эсийн мембраны гэмтлийг үнэлэв. Гистамин, IL-1β, IL-6 болон TNF-α-ийн түвшинг ELISA аргаар тодорхойлов. Үр дүн: C48/80 (10 мкг/мл), Lut (2.5 мкг/мл) болон Lut-Gd (10 мкг/мл) нь илэрхий эсийн хоруу чанар үүсгээгүй. C48/80 нь HMC-1 эсээс гистамин, IL-1β, IL-6 болон TNF-α-ийн ялгаралтыг мэдэгдэхүйц нэмэгдүүлсэн бол Lut болон Lut-Gd нь эдгээр үрэвслийн медиаторын түвшинг статистикийн ач холбогдолтойгоор бууруулж байгаа нь тодорхойлогдлоо (p<0.05). Дүгнэлт: Lut-Gd нь эсийн хоруу чанар үүсгэхгүй концентрацид C48/80өөр өдөөгдсөн HMC-1 эсийн үрэвслийн медиаторын ялгаралтыг дарангуйлж, шигүү мөхлөгт эсийн үрэвслийн эсрэг үйлдэлтэй болох нь тодорхойлогдлоо.