Халифорте капсултай эмийн чанар, аюулгүй байдлын үзүүлэлтийг тодорхойлсон үр дүн

Хураангуй

Уламжлалт анагаах ухаанд өргөн хэрэглэгддэг “Жамц-4 тан” эмийг сонгон авч технологийн боловсруулалт хийн, капсултай эмийн хэлбэрт оруулсан ба энэхүү бэлдмэлийн чанар, аюулгүй байдлын үзүүлэлтийг тодорхойлох зайлшгүй шаардлагатай байгаа юм. Капсултай эмийн ерөнхий үзүүлэлт болох гадна байдал, дундаж жин, задралтыг МУҮФ-н аргачлалын дагуу тодорхойлов. Эмэнд агуулагдах биологийн идэвхт бодисыг нимгэн үет хроматографийн аргаар илрүүлж, БИБ-ийн агууламжийг спектрофотометр болон ӨИШХ-ийн аргаар тодорхойлов. Халифорте капсултай эмэнд кверцетин, жинжерол, галлын хүчил, пиперин агуулагдаж байгааг НҮХ-ийн аргаар илрүүлсэн ба тэдгээрийн Rf утга харгалзан 0.89, 0.76, 0.86, 0.21 байв. Халифорте капсултай эмийн дундаж жин 0,355±0,013, задралт 6.8833±1.07 минут, 2.386±0.032% полифенолт нэгдэл, 0.019±0.0015% жинжерол агуулагдаж байв. Гарган авсан капсултай эм нь 0.35 г дундаж жинтэй, бага зэрэг гашуун, халуун халуун амттай, өвөрмөц хурц үнэртэй байлаа.