Хүний хөдөлмөрийн загварын нэгдсэн үнэлгээний аргын Монгол хувилбарын хүчин төгөлдөр, найдвартай байдлыг судалсан нь

Хураангуй

Үндэслэл: Хүний хөдөлмөрийн загварын нэгдсэн үнэлгээний арга (ХХЗНҮА) нь хөдөлмөр заслын өвөрмөц үзлийг хадгалан, хөдөлмөр засал эмчилгээний үр дүн болон төлөвлөгөөг баримтжуулдаг олон улсад хүлээн зөвшөөрөгдсөн үнэлгээний төрөл юм. ХХЗНҮА нь тухайн хүний онош, шинж тэмдэг, эмчилгээний орчноос үл хамааран хөдөлмөрийн оролцоог үнэлэх бөгөөд сэргээн засах багт ойлгогдохуйц, энгийн үнэлгээний хуудас юм. Энэ үнэлгээний монгол хувилбарын хүчин төгөлдөр, найдвартай байдлын судалгаа Монголын хөдөлмөр заслын талбарт хийгдээгүй байна. Зорилго: Хүний хөдөлмөрийн загварын нэгдсэн үнэлгээний аргын Монгол хувилбарын хүчин төгөлдөр болон найдвартай байдлыг судлах. Арга, аргачлал: ХХЗНҮА-М хувилбарын хүчин төгөлдөр байдлыг Раш анализ, найдвартай байдлыг Cohen’s kappa-г үнэлэхээр R 4.3.2 ашиглаж гүйцэтгэлээ. Үр дүн: ХХЗНҮА-М хувилбарын хүчин төгөлдөр байдлыг Раш анализаар бодоход InMnSq 0.97-1.03, z-score 0.1-0.19, Р-утга 0.87-0.99 хооронд тус тус байна. ХХЗНҮА-М хувилбарын найдвартай байдлыг Cohen’s Kappa-аар үзэхэд 0.72-1 хооронд хэлбэлзэж байна. Cohen’s Kappa-ийн хамгийн их утга (1.00)-ыг үгэн бус харилцаа, харилцан яриа харуулж байна. Дүгнэлт: ХХЗНҮА-М хувилбар хөдөлмөр засал эмчилгээнд хамрагдаж буй үйлчлүүлэгчдийн хөдөлмөрийн оролцоог үнэлэхэд хүчин төгөлдөр, найдвартай хэрэгсэл гэж үзэж байна.