Улаанбаатар хотын хүн амын дундах хөл тавгүйтэх хамшинжийн тархалтыг судалсан нь

Хураангуй

Үндэслэл: Хөл тавгүйтэх хамшинжтэй (ХТХ) хүмүүсийн дийлэнхи нь эмч, эрүүл мэндийн байгууллагад хандах нь ховор, ихэвчлэн урьдчилсан үзлэгээр илэрдэг. Энэ нь аажмаар нойрны чанарт нөлөөлж, улмаар амьдралын чанарыг бууруулдаг болох нь тогтоогдсон. Зорилго: Улаанбаатар хотын хүн амын дунд тохиолдох хөл тавгүйтэх хамшинжийг тархалтыг тогтоох. Материал, арга зүй: Улаанбаатар хотын 18-65 насны нийт хүн амын төлөөлөл бүхий түүвэр хүн ам (n=826)-ын дунд хөл тавгүйтэх хамшинжийг илрүүлэх асуумжийг ашиглан тархалтыг судалсан. Үр дүн: Судалгаанд хамрагдсан хүмүүсийн дунд 6.7% (n=55) нь ХТХ-тэй байв. ХТХ илэрсэн ба илрээгүй хүмүүсийн хүн амзүйн үзүүлэлтүүдийг харьцуулахад дундаж нас, хүйсийн хувьд статистик үнэн магадлал бүхий ялгаатай байв (p<0.01). Эрэгтэйчүүдийн 5.9% (n=12), харин эмэгтэйчүүдийн 7.2% (n=43)-д ХТХ илэрсэн нь статистикийн хувьд үнэн магадалтай буюу эмэгтэйчүүдэд илүү тохиолдож байна (p<0.01). Насны хувьд ХТХ нь ахимаг насны (35-55 насны) аль хүйсийн хүмүүст давамгай тохиолдож байна. Дүгнэлт: Улаанбаатар хотын хүн амын дунд хөл тавгүйтэх хамшинжийн тархалт 6.7% байна. Хүйсийн хувьд эмэгтэйчүүдэд, харин насны хувьд 35-55 насны аль ч хүйсийн хувьд хөл тавгүйтэх хамшинжийн тархалт өндөр байна.